24 ਤੋਂ 26 ਜੁਲਾਈ ਤੱਕ ਸਰੀ ਦੇ ਤਾਮਾਨਾਵਿਸ ਪਾਰਕ ਵਿੱਚ ਹੋ ਰਹੀ U18 ਕੈਨੇਡਾ ਨੈਸ਼ਨਲ ਫੀਲਡ ਹਾਕੀ ਚੈਂਪੀਅਨਸ਼ਿਪ ਵਿੱਚ ਅਲਬਰਟਾ ਦੀ ਨੁਮਾਇੰਦਗੀ ਕਰਨਗੇ 7 ਹੋਣਹਾਰ ਖਿਡਾਰੀ
ਕੈਲਗਰੀ, ਅਲਬਰਟਾ (ਮਹੇਸ਼ਇੰਦਰ ਸਿੰਘ ਮਾਂਗਟ) – ਯੂਨਾਈਟਿਡ ਫੀਲਡ ਹਾਕੀ ਕਲੱਬ ਕੈਲਗਰੀ ਲਈ ਇਹ ਬਹੁਤ ਹੀ ਮਾਣ ਅਤੇ ਇਤਿਹਾਸਕ ਮੌਕਾ ਹੈ ਕਿ ਕਲੱਬ ਦੇ ਸੱਤ ਹੋਣਹਾਰ ਖਿਡਾਰੀਆਂ ਦੀ ਚੋਣ 2026 U18 (ਲੜਕੇ) ਕੈਨੇਡਾ ਨੈਸ਼ਨਲ ਫੀਲਡ ਹਾਕੀ ਚੈਂਪੀਅਨਸ਼ਿਪ ਲਈ ਟੀਮ ਅਲਬਰਟਾ ਵਿੱਚ ਹੋਈ ਹੈ। ਇਹ ਰਾਸ਼ਟਰੀ ਚੈਂਪੀਅਨਸ਼ਿਪ 24 ਤੋਂ 26 ਜੁਲਾਈ ਤੱਕ ਸਰੀ (ਬੀ.ਸੀ.) ਦੇ ਤਾਮਾਨਾਵਿਸ ਪਾਰਕ ਵਿਖੇ ਫੀਲਡ ਹਾਕੀ ਕੈਨੇਡਾ ਵੱਲੋਂ ਫੀਲਡ ਹਾਕੀ ਬੀ.ਸੀ. ਦੇ ਸਹਿਯੋਗ ਨਾਲ ਕਰਵਾਈ ਜਾ ਰਹੀ ਹੈ।
ਟੀਮ ਅਲਬਰਟਾ ਲਈ ਚੁਣੇ ਗਏ ਯੂਨਾਈਟਿਡ ਫੀਲਡ ਹਾਕੀ ਕਲੱਬ ਦੇ ਖਿਡਾਰੀਆਂ ਵਿੱਚ ਅਨਮੋਲ ਝੱਲੀ, ਅਰਸ਼ਦੀਪ ਬਰਨ, ਹਰਮਨ ਗਿੱਲ, ਹਰਕਰਨਵੀਰ ਪਲਾਹਾ, ਗੁਰਨਿਵਾਜ਼ ਸਿੰਘ, ਗੁਰਵਰਦਾਨ ਟਿਵਾਣਾ ਅਤੇ ਜ਼ੋਰਾਵਰ ਗਰੇਵਾਲ ਸ਼ਾਮਲ ਹਨ। ਇਨ੍ਹਾਂ ਨੌਜਵਾਨ ਖਿਡਾਰੀਆਂ ਦੀ ਚੋਣ ਕਲੱਬ ਦੀ ਉੱਚ ਪੱਧਰੀ ਕੋਚਿੰਗ, ਸਖ਼ਤ ਮਿਹਨਤ ਅਤੇ ਖਿਡਾਰੀਆਂ ਦੀ ਲਗਨ ਦਾ ਪ੍ਰਤੀਕ ਮੰਨੀ ਜਾ ਰਹੀ ਹੈ।
ਇਸ ਮਾਣਮੱਤੀ ਉਪਲਬਧੀ ਨੂੰ ਹੋਰ ਵੀ ਖ਼ਾਸ ਬਣਾਉਂਦਿਆਂ ਯੂਨਾਈਟਿਡ ਫੀਲਡ ਹਾਕੀ ਕਲੱਬ ਦੇ ਸੰਸਥਾਪਕ ਅਤੇ ਮੁੱਖ ਕੋਚ ਮਨਦੀਪ ਝੱਲੀ ਨੂੰ 2026 U18 (ਲੜਕੇ) ਟੀਮ ਅਲਬਰਟਾ ਦਾ ਹੈੱਡ ਕੋਚ ਨਿਯੁਕਤ ਕੀਤਾ ਗਿਆ ਹੈ। ਉਨ੍ਹਾਂ ਦੇ ਨਾਲ ਮਨਵੀਰ ਗਰੇਵਾਲ ਨੂੰ ਅਸਿਸਟੈਂਟ ਕੋਚ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ। ਦੋਵੇਂ ਕੋਚ ਰਾਸ਼ਟਰੀ ਚੈਂਪੀਅਨਸ਼ਿਪ ਦੌਰਾਨ ਟੀਮ ਦੀ ਅਗਵਾਈ ਕਰਨਗੇ।
ਸਾਲ 2018 ਵਿੱਚ ਸਥਾਪਿਤ ਯੂਨਾਈਟਿਡ ਫੀਲਡ ਹਾਕੀ ਕਲੱਬ ਕੈਲਗਰੀ ਨੇ ਥੋੜ੍ਹੇ ਸਮੇਂ ਵਿੱਚ ਹੀ ਅਲਬਰਟਾ ਵਿੱਚ ਫੀਲਡ ਹਾਕੀ ਦੇ ਵਿਕਾਸ ਲਈ ਵਿਸ਼ੇਸ਼ ਯੋਗਦਾਨ ਪਾਇਆ ਹੈ। ਕਲੱਬ ਨੇ ਸੈਂਕੜੇ ਨੌਜਵਾਨਾਂ ਨੂੰ ਉੱਚ ਪੱਧਰੀ ਕੋਚਿੰਗ ਮੁਹੱਈਆ ਕਰਵਾਉਂਦਿਆਂ ਸੂਬਾਈ, ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਪੱਧਰ ਤੱਕ ਪਹੁੰਚਣ ਦੇ ਮੌਕੇ ਪ੍ਰਦਾਨ ਕੀਤੇ ਹਨ।
ਕਲੱਬ ਦੇ ਅਧਿਕਾਰੀਆਂ ਨੇ ਕਿਹਾ ਕਿ ਸੱਤ ਖਿਡਾਰੀਆਂ ਦੀ ਟੀਮ ਅਲਬਰਟਾ ਵਿੱਚ ਚੋਣ ਅਤੇ ਮਨਦੀਪ ਝੱਲੀ ਦੀ ਹੈੱਡ ਕੋਚ ਵਜੋਂ ਨਿਯੁਕਤੀ, ਯੂਨਾਈਟਿਡ ਫੀਲਡ ਹਾਕੀ ਕਲੱਬ ਦੀ ਨਿਰੰਤਰ ਮਿਹਨਤ ਅਤੇ ਸਮਰਪਣ ਦਾ ਨਤੀਜਾ ਹੈ। ਪੂਰੇ ਯੂਨਾਈਟਿਡ ਪਰਿਵਾਰ ਨੇ ਚੁਣੇ ਗਏ ਸਾਰੇ ਖਿਡਾਰੀਆਂ ਅਤੇ ਕੋਚਿੰਗ ਸਟਾਫ਼ ਨੂੰ ਵਧਾਈ ਦਿੰਦਿਆਂ 2026 U18 ਕੈਨੇਡਾ ਨੈਸ਼ਨਲ ਫੀਲਡ ਹਾਕੀ ਚੈਂਪੀਅਨਸ਼ਿਪ ਵਿੱਚ ਟੀਮ ਅਲਬਰਟਾ ਦੀ ਸ਼ਾਨਦਾਰ ਸਫ਼ਲਤਾ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ ਹਨ।
