ਭਾਰਤੀ ਖੇਡ ਇਤਿਹਾਸ ਵਿੱਚ ਐਤਵਾਰ ਦਾ ਦਿਨ ਸੁਨਹਿਰੀ ਅੱਖਰਾਂ ਵਿੱਚ ਦਰਜ ਹੋ ਗਿਆ, ਜਦੋਂ ਭਾਰਤੀ ਫ਼ੌਜ ਦੇ ਦੋ ਰੋਅਰਾਂ ਨੇ ਵਰਲਡ ਰੋਇੰਗ ਕੱਪ 2026 ਵਿੱਚ ਦੇਸ਼ ਲਈ ਪਹਿਲੀ ਵਾਰ ਸੋਨ ਤਗ਼ਮਾ ਜਿੱਤ ਕੇ ਨਵਾਂ ਇਤਿਹਾਸ ਰਚ ਦਿੱਤਾ।
ਸਵਿਟਜ਼ਰਲੈਂਡ ਦੇ ਲੂਸਰਨ ਵਿੱਚ ਹੋਏ ਮੁਕਾਬਲੇ ਦੌਰਾਨ ਹਾਵ ਲਕਸ਼ੈ ਅਤੇ ਹਾਵ ਉੱਜਵਲ ਕੁਮਾਰ ਸਿੰਘ ਨੇ ਪੁਰਸ਼ਾਂ ਦੇ ਲਾਈਟਵੇਟ ਮੈਨਜ਼ ਡਬਲ ਸਕੱਲਜ਼ (LM2x) ਵਰਗ ਵਿੱਚ 6:26.09 ਦੇ ਸ਼ਾਨਦਾਰ ਸਮੇਂ ਨਾਲ ਪਹਿਲਾ ਸਥਾਨ ਹਾਸਲ ਕੀਤਾ। ਇਸ ਇਤਿਹਾਸਕ ਜਿੱਤ ਨਾਲ ਭਾਰਤ ਨੇ ਪਹਿਲੀ ਵਾਰ ਵਰਲਡ ਰੋਇੰਗ ਕੱਪ ਵਿੱਚ ਸੋਨ ਤਗ਼ਮਾ ਆਪਣੇ ਨਾਮ ਕੀਤਾ।
ਭਾਰਤੀ ਫ਼ੌਜ ਨੇ ਇਸ ਪ੍ਰਾਪਤੀ ਨੂੰ ਦੇਸ਼ ਅਤੇ ਫ਼ੌਜ ਲਈ ਮਾਣ ਵਾਲਾ ਪਲ ਦੱਸਦਿਆਂ ਕਿਹਾ ਕਿ ਦੋਵੇਂ ਖਿਡਾਰੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਹਾਂਗਕਾਂਗ ਅਤੇ ਨੀਦਰਲੈਂਡ ਦੀਆਂ ਮਜ਼ਬੂਤ ਟੀਮਾਂ ਨੂੰ ਪਿੱਛੇ ਛੱਡ ਦਿੱਤਾ।
ਲੂਸਰਨ ਵਿੱਚ ਹੋ ਰਹੀ ਇਸ ਚੈਂਪੀਅਨਸ਼ਿਪ ਵਿੱਚ ਦੁਨੀਆ ਦੇ 42 ਦੇਸ਼ਾਂ ਦੇ ਕਰੀਬ 650 ਰੋਅਰ ਵੱਖ-ਵੱਖ ਵਰਗਾਂ ਵਿੱਚ ਹਿੱਸਾ ਲੈ ਰਹੇ ਹਨ। LM2x ਵਰਗ ਨੂੰ ਸਭ ਤੋਂ ਚੁਣੌਤੀਪੂਰਨ ਮੁਕਾਬਲਿਆਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ, ਜਿੱਥੇ ਖਿਡਾਰੀਆਂ ਨੂੰ ਭਾਰ ਦੀਆਂ ਸਖ਼ਤ ਸ਼ਰਤਾਂ ਦੇ ਨਾਲ-ਨਾਲ ਉੱਚ ਪੱਧਰੀ ਤਕਨੀਕੀ ਕਾਬਲੀਅਤ ਦਾ ਵੀ ਪ੍ਰਦਰਸ਼ਨ ਕਰਨਾ ਪੈਂਦਾ ਹੈ।
ਇਹ ਦੋਵੇਂ ਚੈਂਪੀਅਨ ਰੋਅਰ ਪੁਣੇ ਸਥਿਤ ਆਰਮੀ ਰੋਇੰਗ ਨੋਡ (ARN) ਨਾਲ ਸਬੰਧਤ ਹਨ, ਜੋ ਕਾਲਜ ਆਫ਼ ਮਿਲਟਰੀ ਇੰਜੀਨੀਅਰਿੰਗ (CME) ਵਿੱਚ ਸਥਾਪਿਤ ਭਾਰਤ ਦਾ ਪ੍ਰਮੁੱਖ ਰੋਇੰਗ ਸਿਖਲਾਈ ਕੇਂਦਰ ਹੈ। ਸਾਲ 2001 ਵਿੱਚ ‘ਮਿਸ਼ਨ ਓਲੰਪਿਕਸ’ ਤਹਿਤ ਸ਼ੁਰੂ ਕੀਤੇ ਗਏ ਇਸ ਕੇਂਦਰ ਨੇ ਕਈ ਅੰਤਰਰਾਸ਼ਟਰੀ ਪੱਧਰ ਦੇ ਖਿਡਾਰੀ ਤਿਆਰ ਕੀਤੇ ਹਨ ਅਤੇ ਹੁਣ ਦੇਸ਼ ਨੂੰ ਪਹਿਲਾ ਵਰਲਡ ਕੱਪ ਸੋਨ ਤਗ਼ਮਾ ਵੀ ਦਿਵਾਇਆ ਹੈ।
