ਸਾਲ 2026 ਦੇ ਪਹਿਲੇ ਛੇ ਮਹੀਨੇ ਨਿਵੇਸ਼ਕਾਂ ਲਈ ਉਤਾਰ-ਚੜ੍ਹਾਅ ਭਰੇ ਰਹੇ ਹਨ। ਆਲਮੀ ਭੂ-ਰਾਜਨੀਤਿਕ ਤਣਾਅ, ਅਮਰੀਕੀ ਆਰਥਿਕ ਨੀਤੀਆਂ ਅਤੇ ਬਾਜ਼ਾਰਾਂ ਵਿੱਚ ਅਨਿਸ਼ਚਿਤਤਾ ਕਾਰਨ ਸੋਨਾ, ਚਾਂਦੀ ਅਤੇ ਸ਼ੇਅਰ ਬਾਜ਼ਾਰਾਂ ‘ਤੇ ਵੱਡਾ ਅਸਰ ਪਿਆ ਹੈ।
29 ਜਨਵਰੀ ਦੇ ਰਿਕਾਰਡ ਉੱਚ ਪੱਧਰ ਤੋਂ ਬਾਅਦ ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ਵਿੱਚ ਤੇਜ਼ ਗਿਰਾਵਟ ਦਰਜ ਕੀਤੀ ਗਈ ਹੈ। ਇਸ ਦੌਰਾਨ ਸੋਨਾ ਲਗਭਗ 20 ਫ਼ੀਸਦੀ ਅਤੇ ਚਾਂਦੀ ਕਰੀਬ 43 ਫ਼ੀਸਦੀ ਤੱਕ ਸਸਤੀ ਹੋ ਗਈ ਹੈ। ਇਸ ਦਾ ਅਸਰ ਸ਼ੇਅਰ ਬਾਜ਼ਾਰ ‘ਤੇ ਵੀ ਨਜ਼ਰ ਆਇਆ, ਜਿੱਥੇ BSE ਸੈਂਸੈਕਸ ਵਿੱਚ 11 ਫ਼ੀਸਦੀ ਅਤੇ NSE ਨਿਫਟੀ ਵਿੱਚ 8.6 ਫ਼ੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ।
ਬਾਜ਼ਾਰ ਮਾਹਰਾਂ ਅਨੁਸਾਰ ਇਸ ਮੰਦੀ ਦੇ ਦੋ ਮੁੱਖ ਕਾਰਨ ਹਨ। ਪਹਿਲਾ, ਅਮਰੀਕੀ ਫੈਡਰਲ ਰਿਜ਼ਰਵ ਦੇ ਨਵੇਂ ਚੇਅਰਮੈਨ ਕੇਵਿਨ ਵਾਰਸ਼ ਦੇ ਸਖ਼ਤ ਰੁਖ਼ ਕਾਰਨ ਵਿਆਜ ਦਰਾਂ ਵਿੱਚ ਜਲਦੀ ਕਟੌਤੀ ਦੀਆਂ ਉਮੀਦਾਂ ਕਮਜ਼ੋਰ ਹੋਈਆਂ ਹਨ, ਜਿਸ ਨਾਲ ਅਮਰੀਕੀ ਡਾਲਰ ਮਜ਼ਬੂਤ ਹੋਇਆ ਅਤੇ ਸੋਨੇ ਦੀ ਮੰਗ ਘਟੀ। ਦੂਜਾ, ਅਮਰੀਕਾ-ਇਰਾਨ ਤਣਾਅ ਅਤੇ ਜੰਗੀ ਹਾਲਾਤਾਂ ਨੇ ਵਿਸ਼ਵ ਆਰਥਿਕਤਾ ਦੀ ਰਫ਼ਤਾਰ ਨੂੰ ਪ੍ਰਭਾਵਿਤ ਕੀਤਾ ਹੈ, ਜਿਸ ਕਾਰਨ ਨਿਵੇਸ਼ਕਾਂ ਦਾ ਭਰੋਸਾ ਵੀ ਡਗਮਗਾਇਆ ਹੈ।
ਹਾਲਾਂਕਿ ਮਾਹਰ ਮੰਨਦੇ ਹਨ ਕਿ ਮੌਜੂਦਾ ਗਿਰਾਵਟ ਲੰਬੇ ਸਮੇਂ ਲਈ ਨਹੀਂ ਰਹੇਗੀ। ਕੇਡੀਆ ਐਡਵਾਈਜ਼ਰੀ ਦੇ ਡਾਇਰੈਕਟਰ ਅਜੇ ਕੇਡੀਆ ਦੇ ਅਨੁਸਾਰ, ਛੋਟੇ ਸਮੇਂ ਵਿੱਚ ETF ਤੋਂ ਨਿਕਾਸੀ ਕਾਰਨ ਸੋਨੇ ਵਿੱਚ 2 ਤੋਂ 5 ਫ਼ੀਸਦੀ ਤੱਕ ਹੋਰ ਕਮੀ ਆ ਸਕਦੀ ਹੈ, ਪਰ ਸਾਲ ਦੇ ਅੰਤ ਤੱਕ ਸੋਨੇ ਦੀਆਂ ਕੀਮਤਾਂ ਵਿੱਚ 12 ਤੋਂ 15 ਫ਼ੀਸਦੀ ਤੱਕ ਵਾਧੇ ਦੀ ਸੰਭਾਵਨਾ ਹੈ।
ਇਕੁਇਨੌਮਿਕਸ ਰਿਸਰਚ ਦੇ ਸੰਸਥਾਪਕ ਜੀ. ਚੋਕਾਲਿੰਗਮ ਦਾ ਕਹਿਣਾ ਹੈ ਕਿ ਅਗਲੇ ਛੇ ਮਹੀਨਿਆਂ ਦੌਰਾਨ ਸਮਾਲਕੈਪ ਅਤੇ ਮਿਡਕੈਪ ਸ਼ੇਅਰ, ਲਾਰਜਕੈਪ ਸ਼ੇਅਰਾਂ ਦੇ ਮੁਕਾਬਲੇ ਬਿਹਤਰ ਰਿਟਰਨ ਦੇ ਸਕਦੇ ਹਨ, ਕਿਉਂਕਿ ਕਈ ਕੰਪਨੀਆਂ ਦੇ ਸ਼ੇਅਰ ਆਪਣੇ ਪੁਰਾਣੇ ਉੱਚ ਪੱਧਰਾਂ ਤੋਂ ਕਾਫ਼ੀ ਹੇਠਾਂ ਵਪਾਰ ਕਰ ਰਹੇ ਹਨ।
ਉੱਧਰ SBI ਸਿਕਿਉਰਿਟੀਜ਼ ਦੇ ਮਾਹਰ ਸੁਦੀਪ ਸ਼ਾਹ ਦਾ ਮੰਨਣਾ ਹੈ ਕਿ ਨਿਫਟੀ ਇਸ ਵੇਲੇ ਕੰਸੋਲੀਡੇਸ਼ਨ ਦੇ ਦੌਰ ਵਿੱਚ ਹੈ ਅਤੇ 23,700–23,730 ਦਾ ਪੱਧਰ ਇਸ ਲਈ ਅਹਿਮ ਸਪੋਰਟ ਸਾਬਤ ਹੋ ਸਕਦਾ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ (FIIs) ਦੀ ਭਾਰਤੀ ਬਾਜ਼ਾਰ ਵਿੱਚ ਪੂਰੀ ਵਾਪਸੀ ਲਈ ਹਾਲੇ ਇੱਕ ਤੋਂ ਦੋ ਤਿਮਾਹੀਆਂ ਦਾ ਸਮਾਂ ਲੱਗ ਸਕਦਾ ਹੈ, ਕਿਉਂਕਿ ਉਹ ਰੁਪਏ ਦੀ ਵਟਾਂਦਰਾ ਦਰ ਵਿੱਚ ਸਥਿਰਤਾ ਦੀ ਉਡੀਕ ਕਰ ਰਹੇ ਹਨ।
